TƏBİB-in dəstəyi ilə Sumqayıt Tibb Mərkəzinin tabeliyində olan Perinatal Mərkəz yeni tibbi avadanlıqlarla təchiz edilib.

Belə ki, Perinatal Mərkəzin Neonatal reanimasiya və intensiv terapiya şöbəsi vaxtından əvvəl doğulmuşlar üçün yeni reanimasiya zalı, müasir küvəzlər, çoxfunksiyalı monitorlar, infuzomatlarla təmin olunub. 

Bununla yanaşı, tibb müəssisəsində 8 reanimasiya çarpayısı artırılıb (panel vasitəsi ilə hava oksigen vakuum nöqtəsi olmaqla). 2 reanimasiya masası və Neopuff -T- Parçalı canlandırıcı cihazı da yeni avadanlıqlar sırasındadır. 

Perinatal Mərkəzdə yeni avadanlıqların təchizindən sonra eyni anda müxtəlif dərəcəli tənəffüs dəstəyinə, neonatal reanimasiya xidmətinə ehtiyacı olan 20 körpəyə xidmət etmək mümkün olacaq.

Yeni reanimasiya zalı vaxtından əvvəl doğulmuş az, çox az və ekstremal az çəkili körpələrin çeşidlənməsi baxımından müalicə işinə müsbət təsir göstərəcək.

Əlavə olaraq Qadın sağlamlıq kabineti kolposkop, ROP müayinəsi uçün indirekt oftolmoskop və KTQ aparatları, 3D və 4D USM avadanlıqları ilə təmin olunub.