COVID-19 respublikamızda yayıldığı ilk vaxtlarda Azərbaycan Respublikasının Prezidenti cənab İlham Əliyev xalqa müraciətində əhaliyə səhiyyənin tövsiyələrinə, dövlətin müəyyənləşdirdiyi mübarizə şərtlərinə ciddi əməl etməyin zəruriliyini tövsiyə etdi. Ölkə başçısının “Biz birlikdə güclüyük!” xatırlatması pandemiyaya qarşı mübarizədə ictimiyyətin də mübarizə sistemində mühüm şərt, böyük güc olduğunu xatırlatdı. Xalq möhtərəm Prezidentimizin bu tövsiyəsinə də ciddi əməl etdi.
Prezident İlham Əliyevin göstərişi əsasında Nazirlər Kabinetinin sərəncamı ilə 2020-ci il yanvarın 30-da “Azərbaycan Respublikasında yeni koronavirus xəstəliyinin yayılmasının qarşısının alınmasına dair Fəaliyyət Planı” təsdiq edildi.
Pandemiya yayıldığı ilk vaxtlardan respublikamızda dövlət səviyyəsində ciddi, olduqca gərəkli, dünya dövlətlərinə nümunə olan tədbirlər həyata keçirildi. 2020-ci il fevralın 27-də COVID-19 pandemiyasının qarşısının alınması, fəsadlarının yayılmaması, müvafiq profilaktik tədbirlərin hazırlanması və həyata keçirilməsi məqsədilə Azərbaycan Respublikasının Nazirlər Kabineti yanında operativ qərargah yaradıldı. Qərargah həm pandemiyanın yayılma səbəbləri ilə bağlı əhalini maarifləndirir, tətbiq edilən mübarizə üsullarının mahiyyətini izah edir, həm də əhalinin əzmini, iradəsini mübarizə şəbəkəsinin ən güclü hissəsi olduğunu insanlara xatırladırdı.
COVID-19 pandemiyasına qarşı aparılan mübarizədə ölkəmizdə bir sıra gərəkli tədbirlər həyata keçirildi ki, bunların sırasında yüksək səviyyədə təchiz edilmiş 20-dən çox xüsusi modul xəstəxananın yaradılması, bəzi xəstəxanaların bu pandemiyanın qarşısının alınması üçün uyğunlaşdırlması böyük əhəmiyyət kəsb edirdi.
Bütün dövrlərdə pandemiya və epidemiyalarda mübarizələrin son və qəti məqsədi bu xəstəliklərə peyvənd tapılması olub. COVID-19 pandemiyasına qarşı mübarizə də peyvəndlərin tapılması və tətbiqini zəruriləşdirmişdi. Bir çox dövlətlərdə müxtəlif şirkətlər pandemiyaya qarşı müxtəlif peyvəndlər hazırlanmasına başladı və Beynəlxalq Səhiyyə Təşkilatı tapılan vaksinlərin bəzilərini dünya dövlətlərinə təklif etdi.
Bütün istiqamətlərdə dinamik inkişaf iqtisadi inkişafdan asılıdır. Azərbaycan Prezidenti İlham Əliyev COVID-19 pandemiyasından hələ çox əvvəl demişdi: “Azərbaycan güclü dövlətdir və onun güclü ordusu vardır”. Tarix təsdiqlədi ki, Prezidentimizin qətiyyətlə dediyi bu fikir həyati tezisdir. Azərbaycan Ordusu Vətən müharibəsində güclü olduğunu birmənalı şəkildə təsdiqlədi.
COVİD–19 pandemiyasına qarşı mübarizə də uğurla başa çatacaq, işğaldan azad edilmiş ərazilərimizdə yenidənqurma işləri də uğurla yekunlaşacaq, otuz ildən bəri doğma yurdlarından didərgin düşmüş insanlar ev-eşiyinə qayıdacaqlar. Prezident İlham Əliyevin dediyi kimi, “Bu gün buraya bu torpaqların sahibləri kimi qayıtmışıq, azad edilmiş bütün torpaqlarda Azərbaycan bayrağı dalğalanır. Bu gün mən Müzəffər Ordumuzun Ali Baş Komandanı kimi Hadrut qəsəbəsində milli bayrağımızı qaldırdım. Bu bayraq burada əbədi dalğalanacaq. Biz azərbaycanlılar bundan sonra öz dədə-baba torpaqlarımızda əbədi yaşayacağıq. Bütün dağılmış şəhərləri, kəndləri yenidən quracağıq, həyat qayıdacaq, insanlar qayıdacaq və biz bütün dünyaya bir daha xalqımızın böyüklüyünü göstərəcəyik”.
Vətən müharibəsində zəfər çalan xalqımız pandemiya ilə mübarizədə də qələbə qazanacaqdır. Burada vaksinasiyanın alternativi yoxdur.
Vaksinlər xəstəliyə yoluxma zamanı ağırlaşmaların və ölüm hallarının qarşısını alan təhlükəsiz vasitədir.
COVID-19 pandemiyası ilə mübarizə hələ başa çatmayıb. Digər dövlətlər kimi, Azərbaycan da bu mübarizədə vaksinasiyanın aparılması mərhələsindədir. Nazirlər Kabinetinin 2021-ci il 16 yanvar tarixli sərəncamı ilə “Azərbaycan Respublikasında COVID-19 xəstəliyi əleyhinə 2021-2022-ci illər üçün Vaksinasiya Strategiyası” qəbul olunub. Prezident İlham Əliyevin böyük uzaqgörənliklə ölkəmizin daxil etdiyi vaksinasiya platformaları öz bəhrəsini verib. Bunun nəticəsidir ki, bu gün ölkəmizdə artıq əhalinin 4 növ vaksin seçimi var. Onların hər biri effektiv və təhlükəsizdir.
Dünya dövlətlərinin hamısı bu və ya digər səbəblərdən bu prosesə operativ başlaya bilmədi. Azərbaycanda bu mühüm mərhələyə vaxtında və çox ciddi diqqət yetirildi. Ölkə başçısının “Bizim üçün prioritet məsələ, – mən bunu qeyd etmişəm, bir daha demək istəyirəm, – insanların sağlamlığıdır, insanların həyatıdır və insanların sosial müdafiəsidir” kəlamları dövlətin apardığı siyasətin başlıca istiqamətinin göstəricisidir. Bu kəlamın həyatiliyi Azərbaycanın dünyada vaksinasiya prosesinə başlayan ilk ölkələr sırasında olmasını təmin etdi.
Vaksinasiya prosesi pandemiyaya qarşı mübarizənin ən həssas və ən məsuliyyətli dövrüdür. Bu prosesin uğurla başa çatması COVID-19 pandemiyası ilə mübarizənin yekunlaşma, bəlkə də başa çatdırılma mərhələsidir.
COVİD-19 pandemiyasına qarşı mübarizədə dövlətin ən yaxın köməkçisi xalq olmalıdır. Bu elə bir mübarizədir ki, burada hamı iştirak etməlidir. Özünüzün və ətrafdakıların virusa yoluxmasının qarşısının alınmasında ən etibarlı vasitələrdən biri peyvəndlənmə – vaksinasiyadır. Vaksinlər xəstəliyə yoluxma zamanı ağırlaşma və ölüm hallarının qarşısını alan təhlükəsiz vasitədir.
Mütəxəssislərə görə, 2-ci dozadan 6 ay keçdikdən sonra yüksək risk qrupuna daxil olanlara (tibb işçiləri, yaşı 60-dan yuxarı olan şəxslər, autoimmun xəstəlikləri olan şəxslər) 3-cü doza vaksin vurulması məqsədəuyğun hesab olunur. Qüvvətləndirici doza kimi istənilən vaksin növü istifadə oluna bilər.
Əminik ki, əhali dövlətin bu istiqamətdə apardığı siyasətin də uğurla başa çatmasında əsl vətəndaşlıq mövqeyi göstərəcəkdir.
Səbinə XASAYEVA,
Milli Məclisin deputatı
Bizi instagramda izləyin
