Səhəri çox acı xəbərlə açdıq. Azərbaycan Dövlət Akademik Musiqili Teatrının sevilən aktyoru, gözəl insan Ağaxan Şərifovu itirdik. Çox təəssüf! 
Teatr rəhbərliyi və kollektivi adından mərhum sənətkarın ailə üzvlərinə, dostlarına, yaxınlarına, doğmalarına   dərin hüznlə başsağlığı veririk.  
  Allah rəhmət eləsin, Ruhu şad olsun!
Ağaxan Şərif oğlu Şərifov 22 oktyabr 1962-ci ildə Ağsuda anadan olub. 1986-1990-cı illərdə Azərbaycan Dövlət Mədəniyyət və İncəsənət Universitetinin dram – kino aktyorluğu şöbəsində təhsil alıb. 1990-1996-ci illərdə Gənclər Teatrında,  1993-2007-ci illərdə İlham Miniatür Teatrında çalışıb. 
2007-ci ildən Azərbaycan Dövlət Akademik Musiqili Teatrınında işləməyə başlayıb.   
 Ağaxan Şərifov bu teatrın səhnəsində yaratdığı bir-birindən maraqlı obrazları ilə - 
1-ci oğlan (”Əlin cibində olsun” O.Rəcəbov, A.Babayev),
 Evlər müdiri (“Talelər qovuşanda” R.Hacıyev), 
Ofsiant (”Qısqanc ürəklər” R.Mirişli, M.Haqverdiyev),
İnzibatçı (”Şeytanın yubileyi” O. Rəcəbov, A.Babayev), 
Çaqqal (“Şəngülüm, Şüngülüm, Məngülüm” O.Zülfüqarov, R.Heydər),
 2-ci xidmətçi (“Milyonçunun dilənçi oğlu” S.Ələsgərov, Ş.Qurbanov),
Cəfər (”Amerikalı kürəkən” R.Mirişli, M.Haqverdiyev), 
Kameraman (“Şəhərdə manyak var” S.Fərəcov, Ə.Nesin),
Nadir (“Matəm marşı və yaxud gözünüz aydın” M.Məmmədov), 
Süpürgəçi (“Ər və arvad” Ü.Hacıbəyli),
Şex Salah (“Kimyagər”S.Kərimi,Ə.Ol),
Dayıoğlu  (“wwwFerzelikefcom” E.Sabitoğlu, C.Məmmədov),
Hambal (“O olmasın, bu olsun” Ü.Hacıbəyli), 
Kral Yubetr (“Yatmış gözəl və cırtdanlar” A.Sadıqov),
Qəbir qazan (“Toya bir gün qalmış” Ə.Səmədli),
Padşah (“999-cu gecə” F.Əmirovun musiqiləri əsasında), 
Şofer, Peyinsatan (“Baladadaşın toy hamamı” F.Allahverdi, Elçin), 
Qədir (”Molla Nəsrəddinin beş arvadı” İ.Sadıqov, tərc.D.Mustafayev) 
tamaşaçıların rəğbətini qazanmışdır. 

 Eyni zamanda "Nə gözəldir bu dünya...” (1999), "Əlavə təsir” (2010), "Yazıçı” (2013) kimi filmlərdə də çəkilmişdir.
Qeyd edək ki, Ağaxan Şərifov "Beş  manatlıq gəlin" (S.Rüstəmov, M.S.Ordubadi) tamaşasında da özünəməxsus obraz yaratmışdır, lakin pandemiya səbəbindən teatr bu səhnə əsərini  tamaşaçılarına  təqdim edə bilmədi.
 Neçə-neçə tamaşa üzərində aktyorun məşqləri yarımçıq qaldı...

Ağaxan Şərifov uzun sürən xəstəlikdən sonra bu gün dünyasını dəyişib. Allah rəhmət eləsin, qəbri nurla dolsun!
Operativ24.az