Türkiyədə koronavirusa yoluxmuş azərbaycanlı hakim İsa Məmmədovun iki həftəlik karantin müddəti başa çatıb.

Bu barədə Report-a 20 yaşlı referinin özü məlumat verib.

O, artıq tam sağaldığını bildirib: "Hər şey yaxşıdır, özümü normal hiss edirəm. Tam olaraq dad və qoxuları hiss edirəm. Dünən karantin dövrü başa çatdı”.

İ.Məmmədovun sözlərinə görə, artıq ondan koronavirusla bağlı analiz götürməyəcəklər:

"Özümü narahat hiss etsəm, zəng edəcəyəm, gəlib yoxlayacaqlar”, - hakim deyib.

Qeyd edək ki, İsa Məmmədov Karabük Universitetinin Bədən tərbiyəsi və idman fakültəsində İdman idarəçiliyi ixtisası üzrə III kursda təhsil alır.

O, Karabükdə futbol üzrə həvəskarlar liqasında hakimlik edir.