Operativ24 xəbər verir ki, konfransda elm və təhsil naziri Emin Əmrullayev, əmək və əhalinin sosial müdafiəsi naziri Sahil Babayev, Ailə, Qadın və Uşaq Problemləri üzrə Dövlət Komitəsinin sədri Bahar Muradova, Milli Məclisin Ailə, Qadın və Uşaq Məsələləri Komitəsinin sədri Hicran Hüseynova, BMT-nin Azərbaycan Respublikasındakı Rezident Əlaqələndiricisi Vladanka Andreeva, eləcə də digər rəsmi şəxslər və qonaqlar iştirak edirlər.

Tədbirin açılışında çıxış edən Ailə, Qadın və Uşaq Problemləri üzrə Dövlət Komitəsinin sədri Bahar Muradova deyib ki, ölkəmiz adıçəkilən mövzuda açıq müzakirələr, maraqlı debatlar, təcrübə mübadiləsi üçün əlverişli platforma rolunu oynamaqla yanaşı, fərqli mədəniyyətlərin sintezi olan əsil mültikulturalizmlə yaxından təmas üçün də unikal bir məkandır.

O, həmçinin qeyd edib ki, münaqişə və müharibə dövründə, iqtisadi-sosial problemlərdən təsirlənmiş ailələrin psixo-sosial durumunu kəskinləşdirən səbəblərin aradan qaldırılması, onların rifahına, hüquqlarının təmin edilməsinə xidmət edən mühüm qərarlar, qanunlar, dövlət proqramları, qəbul edilmiş, uğurla həyata keçirilmiş, həmçinin yeni təsisatlar yaradılıb.

Bahar Muradova çıxışı zamanı bildirib ki, Dövlət Komitəsinə hər il təqribən 400-ə yaxın müraciət daxil olur.

Elm və təhsil naziri Emin Əmrullayev deyib ki, bir çox hallarda məişət zorakılığının gizlədilməsi həll yolu kimi görülsə də, hamısı müəyyən edilməli, araşdırılmalı və müvafiq qurumlar tərəfindən addımlar atılmalıdır. O, məktəblərin bu cür hallarda ən yaxşı güzgü olduğunu deyib. Nazir çıxışı zamanı, həmçinin bildirib ki, məişət zorakılığı halları araşdırıldıqdan sonra cəmiyyətə bununla bağlı məlumat verilməlidir ki, bu cür hallar diqqətdən kənarda və cəzasız qalmır.

Əmək və əhalinin sosial müdafiəsi naziri Sahil Babayev məişət zorakılığı barədə nitqi zamanı bildirib ki, bu məsələdə ən böyük təhlükə və çətinliklərdən biri də qızların təhsildən uzaqlaşdırılmasıdır.

Daha sonra tədbir panel müzakirələri ilə davam edib.

Qeyd edək ki, "Məişət zorakılığının qarşısının alınması: imkanlar və perspektivlər" mövzusunda beynəlxalq konfrans dekabrın 7-də panel müzakirələri ilə davam edəcək.