Meşəli faciəsi də xalqımızın başına gətirilən müsibətlərin bir hissəsidir. Bəli, bir hissəsi. Erməni daşnaqlarının xalqımızın başına gətirdiyi dəhşətlər o qədər çoxdur ki, danışdıqca ardı gəlməkdə davam edir.

Yaxın günlərdə Vaqif Xaçaturyanın saxlanılması ilə həm meşəlilər, həm də bizlər o dəhşətli anlara bir də qayıtmış olduq.

O vaxt meşəlilərlə bərabər əsgərlərimiz də döyüşür, canı bahasına o günahsız, əliyalın insanları mühasirədən xilas etmək üçün əllərindən gələni edirdilər. Həmin qəhrəmanlardan biri də Hidayətov Rüstəmovdur.

Qəhrəmanımız 19 avqust 1970-ci ildə Ağdam rayonunun Xıdırlı kəndində dünyaya göz açıb. Burada orta məktəbi bitirən Hidayət daha sonra Ağdam 50 saylı texniki-peşə məktəbində təhsilini davam etdirib. 1988-1990-cı illərdə Sovet Ordusunda hərbi xidmətdə olan igidimiz 1991-ci il Ağdam rayonu Daxili İşlər Şöbəsinin post-patrul alayına daxil olur. Vətənimizin cəsur övladı qaynar döyüşlərə girməkdən heç çəkinmir. Şərəfli döyüş yolu keçən Hidəyət bu zaman kəsiyində çox sayda qəhrəmanlıqlar göstərsə də, özünü xalqına, millətinə qurban verdi. 23 dekabr 1991-ci il erməni işğalçıları Meşəli kəndinə hücum edərək ağılasığmaz vəhşiliklər törədən zaman düşmənə qarşı gedən döyüşlərə Hidayət də qatılmışdı. Boş evlərin birini özünə istehkam seçən cəsur polis çavuşu Hidayət qəfil sərrast atəşlərlə erməni quldurlarının xeyli qüvvəsini məhv etdi. Bu zaman Murdar erməni faşistləri evə od vurdular. Qorxunun nə olduğunu bilməyən Azərbaycan döyüşçüsü son nəfəsinə qədər vuruşdu və qəhrəmancasına həlak oldu.

Özünü vətəninə, xalqına fəda edən oğlumuz subay idi. Bəlkə neçə arzusu, diləyi onunla birgə torpağa gömüldü. Lakin o bunlara bilərəkdən, xalqının dar günündə günahsız insanların imdadına yetişmişdi. Özünü, arzularını, xəyallarını ana vətəninə qurban verərək, şəhidlik zirvəsinə ucaldı.

Qeyd edək ki, Azərbaycan Respublikası prezidentinin 8 oktyabr 1992-ci il tarixli 264 saylı fərmanı ilə Rüstəmov Hidayət Eldar oğluna ölümündən sonra “Azərbaycanın Milli Qəhrəmanı” adı verilmişdir.

O, Ağdam rayonunun Şəhidlər xiyabanında dəfn edilib.