Bu gün Fransada öz vəzifə öhdəliklərini yerinə yetirən Azərbaycan Televiziyasının əməkdaşlarına qarşı zorakılıq törədilib. Çəkiliş zamanı onların kamerası əllərindən alınıb və jurnalistlərə silah çəkilib.

Məsələ ilə bağlı Medianews.az-a açıqlama verən deputat Arzu Nağıyev bildirir ki, Fransada güc hüquqdan daha üstün hesab olunur. Millət vəkili qeyd edir ki, bu artıq onlar üçün simvola çevrilib:

“Fransada Azərbaycan Televiziyasının əməkdaşlarına qarşı törədilən cinayət bir daha göstərir ki, daima insan haqları və demokratiyadan dəm vuran Fransa birmənalı şəkildə insanlara qarşı qanunsuz hərəkətlər edir. Əsas məsələ isə bu hadisənin sakit formada öz vəzifəsini yerinə yetirən jurnalistə, çəkiliş qrupuna qarşı yönəlib. Dünyanın heç bir demokratik ölkəsində jurnalistlərə qarşı belə hərəkətlərə yol verilmir. Bu hadisə ancaq diktatura hökm sürən dövlətlərdə baş verə bilər. Fransada isə bu hadisənin törədilməsi böyük təəssüf doğurur. Bununla yanaşı, əməkdaşlarımızın təhlükəsizliyi və zərər görən çəkiliş vasitələri ilə bağlı hüquq-mühafizə orqanlarına müraciətlərə də məhəl qoyulmur. Gücün hüquqdan üstün olduğunu simvola çevirən Fransa vaxtilə erməni terrorizmini necə dəstəkləyirdisə, indi də həmin hadisələr təkrarlanır.

Zənnimcə, bu hadisə bütün dünya dövlətləri tərəfindən qəti şəkildə qınanmalı və belə məsələlərə diqqət yetirilməlidir. Beynəlxalq media təşkilatları, həmçinin Avropa Jurnalistlər Birliyi törədilən zorakılığa qarşı ciddi reaksiya bildirməlidirlər. Bunu edən şəxslər isə sərt şəkildə cəzalandırılmalıdırlar”.

Aytac Şahin

Medianews.az