Rəqqasə və aktrisa Oksana Rəsulova qısa zamanda necə arıqlamasından, ana olandan sonra həyatında baş verən dəyişikliklərdən söz açıb.

Axşam.az-ın suallarını cavablandıran Oksana bildirib ki, uzun müddətdir sağlam qidalanır:

“Süd verilən zaman düzgün qidalanmaq lazım idi. Daha sonra klinikada iynəsiz prosedurlar etdirdim. Ora bir çox insan gedir, ancaq hər kəs arıqlaya bilmir. Çünki prosedurlarla yanaşı, düzgün qidalanmaq da labüddür. Dörd gündən bir istədiyim yeməklərdən yeyirəm, qalan günlər isə sağlam qidalanıram. Bu, mənə çox xoşdur. Tort, şirniyyat və digər qidaları da yeyirəm, amma qədərində”.

Rəsulova bir müddət uzun və geniş libaslara müraciət etməsinə də aydınlıq gətirib:

“Uşaq doğulandan sonra kök idim deyə, onları ört-basdır etmək üçün geniş və uzun libaslar geyinirdim. İstəmirdim ki, daha da kök görünüm. Hazırda hamiləlikdən öncəki Oksanaya qayıtmışam. Ona görə də istədiyim kimi geyinirəm”.



Aktrisa söyləyib ki, bəzən analar görüntülərində olan dəyişikliyə görə övladlarından imtina edir:

“Hər bir ana fiziki cəhətdən dəyişə bilər, şişkinlik ola, üzü sallana, qolları, əlləri ətli qala bilər. Bir çox analar bundan depresiyaya düşür. Elələri var ki, öz görüntüsünə görə, uşaqdan imtina edib, onlara sevgi vermirlər. Övlada görə hər şey etməyə dəyər. Arıqlamasam da, heç vaxt heyfslənməzdim. On il də bu görüntüdə qalsaydım, peşman olmazdım. Məni sevən olduğum kimi qəbul etməlidir və edir”.

Oksana ana olandan həyata baxışının dəyişdiyini deyib:

“Ana olandan sonra insan dəyişir. Başqa şeyə dəyər verəndə, digərinin daha qiymətli olduğunu görürsən. Hər şeyi götür-qoy edirsən. Əvvəllər çox səbrsiz idim, əsəbiləşirdim, aqressiv yanaşırdım. Hazırda eşitmirəm, qulaq asmıram. Çünki bunlar artıq maraqlı deyil”.

“Natavan Həbibini təbrik etmişəm, inşallah, yığıncaq edər, yenə gedib, təbrik edərəm” deyə, Oksana eks-rəfiqəsindən də söz açıb.

Sənətçi yaradıcılığından da danışaraq, “Oksi media” şirkətinin yeni film istehsal etdiyini bildirib:
“Bu yay romantik melodram çəkirik. Baş rolda mən və Şəhriyar Əbilovdur. Adı isə hələki yoxdur”.