Azərbaycan Ordusunun cəbhədə Ermənistan silahlı qüvvələrinə sarsıdıcı zərbələr vurması, əldə etdiyi qələbələr vətəndaşlarımız, xaricdə yaşayan soydaşlarımız, həmçinin bir sıra digər ölkələrin vətəndaşları tərəfindən böyük sevinclə qarşılanır. Onlar sevinc hisslərini Azərbaycan Prezidenti, Silahlı Qüvvələrin Ali Baş Komandanı İlham Əliyevə yazdıqları məktublarda ifadə edirlər.


Prezidentin saytına istinadla həmin məktubların bir neçəsini təqdim edirik.


ABŞ-ın Hyuston şəhərindən Təranə Teylor Prezidentə yazır: "Hörmətli Prezident, cənab Ali Baş Komandan, öz adımdan, ailəmiz adından və Hyustonda yaşayan azərbaycanlılar adından Sizi və şanlı Ordumuzu düşmən üzərində gözəl qələbələrə görə ürəkdən təbrik edir və alqışlayıram. Sizə haqq işimizdə uğurlar arzu edirik. Sizin xarici informasiya agentliklərinə müsahibələrnizi izlədikcə belə müdrik, yüksək təhsilli, humanist və eyni zamanda, Vətən üçün qəti sözünü deməyə çəkinməyən rəhbərimizin olması ilə fəxr edirik. Sizi dəstəkləyirik və əlimizdən gələn yardımı etməyə hazırıq. İşimiz haqdır, qələbə bizimlədir!”.


Seneqalın "Xalq uğrunda Birlik” partiyasının sədri, xüsusi işlər üzrə səfir, Seneqal Prezidentinin xüsusi işlər üzrə müşaviri, Əl-Mədinə təbliğat qrupunun sədri və baş müdiri Şeyx Məhəmməd Əl-Mənsur Ənyas yazır: "Zati-aliləri cənab İlham Əliyev, möhtərəm cənabınıza Allahın salamı olsun. Ermənistan tərəfindən Azərbaycan torpaqlarında törədilən açıq-aşkar cinayətlərlə müşayiət olunan son xəbərləri böyük təəssüf və ürək ağrısı ilə izlədik. Harada olmağımızdan asılı olmayaraq, var qüvvəmizlə Sizin - qardaşlarımızın yanında olmaq, ölkənizə qarşı müharibədə haqlarınızı və torpaqlarınızı qoruyarkən Sizə dəstək vermək bizim müsəlmanlıq borcumuzdur.


"Əgər Allah sizə yardım edərsə, heç kəs sizə qalib gələ bilməz” (Quran, Al İmran, 160). Şükürlər olsun Allaha, bu gün Siz Vətəninizi müdafiə etməklə özünüzü iki xoş əməldən biri qarşısında qoymusunuz: zəfər və ya da şəhadət. Ağlı başında, bəsirətli insanlar Sizin mövqeyinizin ədalətli olduğunu, müdrik addımlarınızı, səbrinizi və sülh məramınızı görürlər. Biz Seneqaldan Sizinlə tam həmrəyliyimizi, yanınızda olduğumuzu bəyan edir, Allahın düşmənlərinizə qarşı Sizə kömək olması, gücünüzü artırması, bütün müsəlmanların izzəti və fəxri olaraq qalmağınız üçün dua edirik. Qələbəyə yaxın olduğunuzu bəyan edərək Sizə "Davam edin, Allah sizinlədir!” deyirəm. Bəyan edirik ki, Siz istədiyiniz vaxt yanınıza gələrək ölkənizi qorumaq, zəfərinizi yaxınlaşdırmaq üçün müharibəyə qatılmağa hazırıq. Allahın nəzərləri üzərinizdə olsun! Bir daha Sizinlə həmrəy olduğumuzu və Sizi dəstəklədiyimizi bəyan edərək, Allahdan Sizə zəfər, təhlükəsizlik və əmin-amanlıq bəxş etməsini diləyirik”.


Türkiyə Ehtiyatda olan Zabitlər Dərnəyinin sədri, ehtiyatda olan general-mayor Namik Kamal Çalışkan Ankaradan dövlətimizin başçısına yazır: "Hörmətli cənab Prezident, bir kökə mənsub olmaqdan qürur duyduğumuz böyük türk birliyinin azad və müstəqil bir dövləti olan Azərbaycan Respublikası mərhum liderimiz Heydər Əliyevin "bir millət, iki dövlət” sözləri ilə ifadə edildiyi kimi həm də bizim Vətənimizdir. Bundan əlavə, ulu öndər Mustafa Kamal Atatürkün dediyi kimi "Azərbaycanın sevinci sevincimizdir, kədərimiz kədərimizdir". Yuxarı Qarabağ da daxil olmaqla torpaqlarınızın bir hissəsini işğal edən ermənilər Birləşmiş Millətlər Təşkilatı və ATƏT-in qərarlarına baxmayaraq bu işğalı davam etdirirlər. Onların mülki əhaliyə qarşı insanlığa sığmayan hərəkətləri qəbul edilə bilməz. Bu işğala və Ermənistanın son vaxtlar həyata keçirdiyi təcavüzə qarşı başladığınız mübarizə bizi qürurlandırdı. Bu qəti mübarizənizdə qələbə qazanacağınıza, illərdir davam edən haqsız işğala son qoyacağınıza, münaqişəni sülh yolu ilə həll etmək istəməyən Ermənistanı və onların havadarlarını sülhə məcbur edəcəyinizə əminəm. Türkiyə Respublikası və türk xalqı hər zaman Azərbaycana qardaşdır. Bu çərçivədə hökumətimizin elan etdiyi dəstək iradəsi xalqımızın da iradəsidir. Türkiyə Ehtiyatda olan Zabitlər Dərnəyi olaraq Azərbaycanı sona qədər dəstəkləyirik. Hər zaman və hər yerdə Azərbaycan Ordusuna hər cür töhfə verməyə hazır olduğumuzu bəyan edirik. Bu müqəddəs mübarizədə şəhid olan qardaşlarımıza mərhəmət və qazilərimizə təcili şəfa diləyirik. Bütün xalqınıza başsağlığı verir, ehtiramımızı bildiririk”.


Avstriyanın Vyana şəhərindən Ayan Məmmədli: "Əziz Prezidentimiz, cənab İlham Əliyev, mən hazırda xaricdə təhsil alan yüzlərlə azərbaycanlı tələbələrdən biri kimi doğma Azərbaycanımızın müqəddəs torpaqlarının Sizin rəhbərliyinizlə şanlı Ordumuz tərəfindən işğalçılardan azad edilməsinin sevincini uzaq Avstriyada böyük həyəcanla yaşamaqdayam. Hər gün bu qərib ölkədə doğma yurdumdan aldığım zəfər xəbərləri qəlbimi qürur hissi ilə doldurur. Döyüş meydanlarında şücaət göstərən əsgərlərimizin hər uğurunu ailəmin Xocalıda şəhid olmuş əzizlərinin intiqamının alınması kimi dəyərləndirirəm. Hələ keçən il Avstriya Konservatoriyasında musiqi təhsilin almağa başlayanda ən böyük arzum o olmuşdur ki, Vətənə yetkin musiqiçi kimi dönəndə ilk ifamı yurdumun musiqi beşiyi olan Şuşada səsləndirim. Bu gün çox sevincliyəm ki, digər ərazilərimiz kimi, Şuşanın da azad olunmasına sayılı günlər qalıb. Bu sevinci və xoşbəxtliyi biz tələbə və gənclərə yaşatdığınız üçün Sizə sonsuz minnətdarlığımı bildirirəm. Hazırda doğma Vətəndən uzaqda olsaq da, qəlbimiz xalqımızın qəlbi ilə bir döyünür. Bu sınaq günlərində müzəffər Ordumuza can sağlığı və yalnız böyük qələbələr arzu edirəm. Dualarımız və sevgilərimiz sizinlədir! Yaşasın dünya azərbaycanlıları, yaşasın Ali Baş Komandanımız, yaşasın doğma Azərbaycanımız!”.


Ukraynanın Sumı Vilayət Deputatlar Şurasının sədri Vladimir Tokar: "Hörmətli cənab Prezident, Ukrayna ilə Azərbaycan arasında daim dost və tərəfdaşlıq münasibətləri olub. Azərbaycan dost bir ölkə kimi Ukraynanın beynəlxalq səviyyədə tanınmış sərhədləri daxilində ərazi bütövlüyünü dəstəklədi və dəstəkləməyə davam edir. Odur ki, bu gün Azərbaycan ərazi bütövlüyü üçün ədalətli bir mübarizə apararkən, şəxsən mən uzun müddət Bakıda və ölkənin digər şəhərlərində yaşamış bir insan kimi Sizi və bütün Azərbaycan xalqını dəstəkləyirəm. Axı, Dağlıq Qarabağ beynəlxalq səviyyədə Azərbaycanın bir hissəsi kimi tanınıb. Sumı Vilayət Deputatlar Şurasının sədri, həmçinin bir siyasətçi kimi hesab edirəm ki, Azərbaycanla Ermənistan arasında münaqişə sülh yolu ilə həll olmalıdır. Ermənistanın beynəlxalq hüququ, sülh danışıqlarını açıq şəkildə pozan və insan tələfatı ilə nəticələnən hücumlarını qınayıram. Sülhsevər Azərbaycan və Ukrayna xalqlarına bu çətin lokal münaqişələrdən ən qısa zamanda xilas olmağı və ölkələrində sülhü və sabitliyi bərpa etməyi arzulayıram”.


Gürcüstanın Bolnisi rayonunun Talaveri kəndindən Abbasov Bayram, Natiq İsrailov, Xosrov İsmail, Svetlana Eyvazova və Nərgiz Eyvazova yazırlar: "Hörmətli cənab Prezident, Gürcüstanda yaşayan azərbaycanlıların adından müraciət edərək işğalçı ermənilərə qarşı həyata keçirdiyiniz ədalət müharibəsində Sizi tam dəstəklədiyimizi bildiririk. Azərbaycan beynəlxalq hüquqa uyğun olaraq haqqını icra edir, Birləşmiş Millətlər Təşkilatının Qarabağın işğaldan azad edilməsi ilə bağlı qətnamələrinin icrasını tələb edir. Qarabağ Azərbaycandır!”.


Gəncə şəhərindən Fazil Səfixanov: "Hörmətli Prezident, cənab Ali Baş Komandan. Azərbaycanın işğal olunmuş torpaqlarının azad edilməsi uğrunda gedən döyüşlərdə Ordumuzun uğurla irəliləməsi, yeni-yeni bölgələrimizi düşməndən təmizləməsi ilə bağlı Sizə minnətdarlığımı bildirirəm. Bu məhz Sizin sayənizdə mümkün olur. Qürurla bildirirəm ki, bir vətəndaş kimi dövlətim və Vətənim qarşısında müqəddəs borcumu yerinə yetirməyə hər zaman hazıram və könüllü olaraq cəbhəyə getmək üçün müraciət etmişəm. Lakin ahıl yaşımla əlaqədar olaraq döyüşlərə aparmırlar. Cənab Ali Baş Komandan, Sizdən xahiş edirəm, göstəriş verin ki, məni də Orduya qəbul etsinlər. Hər zaman Sizin yanınızdayıq, hər an döyüşə hazırıq. Hər şey üçün Sizə minnətdaram. Yaşasın müzəffər Ordumuz!”.


Cəbrayıl rayonunun Böyük Mərcanlı kəndindən Rauf Musayev: "Hörmətli Prezident, cənab Ali Baş Komandan, 27 ildən sonra doğma Cəbrayılımızın erməni tapdağından azad edilməsi sevincini bizə bəxş etdiyinizə görə Sizə dərin minnətdarlığımızı bildiririk. Biz cəbrayıllılar Sizin uzaqgörən siyasətinizi dəstəkləyirik. Verdiyiniz qərarlar və qətiyyətli mövqeyinizlə bizi qələbədən qələbəyə aparırsınız. İnanırıq ki, Sizin rəhbərliyinizlə Ordumuz yeni-yeni zəfərlər qazanacaq. Hörmətli Ali Baş Komandan, biz cəbrayıllılar daim Sizin əmrinizi gözləyir, ölkəmiz uğrunda döyüşməyə hər an hazır olduğumuzu bildiririk. Yaşasın müstəqil Azərbaycan!”.


Cəbrayıl rayonundan məcburi köçkün Gültəkin Maxsudova: "Möhtərəm cənab Prezident, Sizin siyasətiniz nəticəsində doğma torpağımız – Cəbrayılımız erməni işğalçılarından azad edildi. Sizə ailəmiz, Quycaq kənd camaatı, bütün cəbrayıllılar adından dərin təşəkkürümü bildirirəm. 27 ildir ki, düşmən tapdağı altında qalan doğma yurd yerimizə yenidən gedəcəyimiz, cənnətməkan torpağının havasını udacağımız, o buz kimi bulaqların suyundan yenidən dadacağımız günü səbirsizliklə gözləyirik. Bu gün Siz bizə yeni nəfəs, yeni ruh bəxş etdiniz. Biz Sizinlə və bütün hərbçilərimizlə fəxr edirik, qürur duyuruq. Allah Sizi və bütün hərbçilərimizi qorusun”.


Gəncə şəhərinin 32 saylı tam orta məktəbinin 10-cu sinif şagirdi Qənirə Rzazadə: "Hörmətli cənab Ali Baş Komandan, yaşadığımız tarixi günlərdən son dərəcə ilhamlanaraq, mən də bir məktəbli kimi Sizə məktub yazmağı özümə borc bildim. Cəbrayıl şəhərinin işğaldan azad olunması xəbəri hamımızda böyük sevincə səbəb oldu. Nəzərinizə çatdırmaq istərdim ki, Ermənistanın səngiməyən təxribatları Gəncə şəhərində heç bir narahatlıq yaratmır, əksinə, hər kəsdə mübarizə ruhu vardır. Sizin sayənizdə Azərbaycan dünyada öz sözünü deyə biləcək qüdrətli dövlətə çevrilib. Sizin bütün təşəbbüslərinizi dəstəkləyirik və gələcəkdə də daim dəstəkləyəcəyik. Artıq haqqın zamanı çatıb. Rəşadətli Azərbaycan Ordusu haqqın, ədalətin mücahidlərinə çevrilib. Qarabağ artıq onların həyat amalıdır. Təbiidir ki, Ermənistanın muzdlu döyüşçüləri Vətən həsrəti ilə alışıb-yanan Azərbaycan əsgərini məğlub etməyə qadir deyil. Minlərlə şəhidlərimizin qanı yerdə qalmamalıdır. Şəhid anasının göz yaşları hədər olmamalıdır. Yalnız uğrunda şəhidlik zirvəsinə ucaldıqları torpaqlar qaytarıldıqdan sonra onların ruhu rahatlığa qovuşacaqdır. Qardaş Türkiyə və Pakistan dövlətləri və xalqı mənəvi dəstək yerimiz oldu. Onlara da təşəkkürlərim sonsuzdur. Sizə ailəmiz adından minnətdarıq ki, bizim Prezidentimizsiniz. Uğurlarımız və zəfərlərimiz daimidir. Azərbaycan Ordusu həmişə müzəffərdir. Qarabağ bizimdir. Qarabağ Azərbaycandır”.


Kəlbəcər rayonundan məcburi köçkün Vüsal Musalı: "Hörmətli cənab Prezident, Allah Sizdən razı olsun. Allah bizi dəstəkləyən ölkələrin, Rəcəb Tayyib Ərdoğan kimi saleh dostlarımızın sayını artırsın. Siz bu günlərdə xalqımızın Sizə olan etimadını bir daha doğrulutdunuz. Bir şəhid övladı olaraq torpaqlarımızın erməni işğalından azad olunmasında göstərdiyiniz qətiyyətli mövqeyinizi dəstəkləyir və bu yolda yürütdüyünüz siyasət uğruna canımı fəda etməyə hazır olduğumu bildirirəm. Qarabağ bizimdir! Qarabağ Azərbaycandır!”.


Quba şəhərinin skaini Gülnarə Məclumova yazır: "Hörmətli cənab Prezident, torpaqlarımızın işğaldan azad edilməsini çoxdan gözləyirdik. Təhsil işçisi olaraq, əminliklə deyə bilərəm ki, məhz Sizin uğurlu siyasətiniz nəticəsində biz artıq Qələbənin astanasındayıq. Bunun üçün Sizə və şanlı Ordumuza minnətdaram. Düşmən üzərində qazanılan zəfərlərə görə Sizi və xalqımızı təbrik edirəm. Var olsun yenilməz Azərbaycan Ordusu və cənab Ali Baş Komandanımız! Qarabağ Azərbaycandır!”.


Laçın rayonunun Minikənd kəndindən Sənan Əmirov: "Rəşadətli, möhtərəm Ali Baş Komandanımız, müdrik və qətiyyətli rəhbərliyinizlə yeni-yeni ərazilərimizin düşmənlərdən azad edilməsi və qürurverici qələbələrimiz münasibətilə Sizi təbrik edirik. Yaxın zamanlarda tam qələbəmizi bayram edəcəyimizə əminik. Hər birimiz, bütün xalq Sizinlədir. Vətənimizin düşməndən azad edilməsi naminə son damla qanımızadək vuruşmağa hazırıq və bunun üçün könüllü olaraq müraciət etmişik. Möhtərəm Prezidentimiz, Siz müdrik lider kimi, dövlətimizin-xalqımızın tarixinə şərəfli səhifələr yazmısınız. Rəşadətli rəhbərliyinizlə apardığınız bu şərəfli müharibə həm Vətən torpaqlarımızı düşməndən azad edəcək, həm də son 200 ildə mənfur qonşumuz ermənilərin bizə etdiklərinə, onların işğalçılıq siyasətinə və hərəkətlərinə layiqli tarixi cavab olacaq. Mövcud qlobal, sosial-siyasi çətinliklər mühitində, haqq işi uğrunda mübarizədə Sizə yeni uğurlar diləyirik, əziz liderimiz. Qarabağ Azərbaycandır! Qələbə bizimlədir! Biz öz rəhbərimizə dərindən inanırıq, güvənirik, daim Sizinləyik. Sizinlə və şücaətli Ordumuzla fəxr edirik”.


Bərdə rayonunun Gərənə kəndindən Sevinc Bahadurlu: "Cənab Prezidentim, Bərdə rayon Alpout kənd tam orta məktəbinin kollektivi adından yazaraq bildiririk ki, bu şərəfli zəfər yolunda daim Sizin yanınızdayıq və hər zaman Sizi dəstəkləyirik. Uca Yaradan Sizi, Ordumuzu, xalqımızı qorusun. Azərbaycan xoşbəxt ölkədir ki, güclü ordusu və onun başında duran uzaqgörən Ali Baş Komandanı var. Əziz Prezidentimiz, arzumuz, amalımız Sizinlə, Ordumuzla irəli, qələbəyə doğru getməkdir. İnanırıq ki, Sizin və məğrur Ordumuzun sayəsində işğal olunmuş torpaqlarımız tezliklə qaytarılacaq, üçrəngli bayrağımız Qarabağda dalğalanacaq”.


Tovuz rayonunun sakini Ramin Qələndərov: "Çox hörmətli cənab Prezident, biz Tovuz rayonunun çoxsaylı gəncləri Qarabağın düşməndən azad olunması barədə şanlı Ordumuza, qəhrəman əsgərlərimizə Sizin verdiyiniz əks-hücum əmrini ürəkdən bəyənir, dəstəkləyirik və mənfur düşmənə qarşı mübarizədə bizim hər birimiz əsgəriniz olaraq döyüşlərə qatılmağa hazırıq. Cənab Ali Baş Komandan, artıq 30 ilə yaxındır ki, düşmən tapdağında olan Qarabağımızın Sizin dönməz siyasətiniz, mətin iradəniz və Ali rəhbərliyinizlə azad olunmasında biz Tovuz gəncləri olaraq iştirak etməyə hazırıq. Ordumuza uğurlar arzulayırıq”.


Naxçıvan Muxtar Respublikasının Şərur rayonunun Sərxanlı kəndindən Elvin Quliyev: "Hörmətli Prezident, cənab Ali Baş Komandan, Sizin rəhbərliyinizlə ordumuzun torpaqlarımızın işğaldan azadlığı uğrunda apardığı mübarizədə hər gün eşitdiyimiz yeni zəfər, yeni uğur, yeni qələbə sevincini Uca Allahın yardımı ilə xalqımıza bəxş etdiyiniz üçün Sizə dərin minnətdarlığımızı bildirir, qələbələr münasibətilə Sizi səmimi qəlbdən təbrik edirik. Bu zəfərin əldə edilməsi Sizin ağıllı və savadlı siyasətinizin, müdrik uzaqgörənliyinizin bariz nümunəsidir. Haqq yolunda aparılan mübarizəmizdə Ali Baş Komandan olaraq Sizə güvənirik. Bu günlərdə yaşadığımız zəfər coşqusu bizlərə hər an sevinc göz yaşları, sevincdən doğan qəhər bəxş edir. Bu məktubu yazarkən belə, ardı-arası kəsilməyən, sevincli zəfər xəbərləri eşidirəm. Bir Vətən övladı olaraq azadlıq uğrunda canımdan, qanımdan keçmək üçün səbirsizliklə əmrinizi gözləyirəm. Allah Sizi var etsin, daim qorusun. Biz Sizinləyik, yanınızdayıq. Bir Vətənimiz var - Azərbaycan. Bir şüarımız var - Qarabağ Azərbaycandır!”.
Şamaxı rayonundan Samir Xanaliyev: "Möhtərəm Prezident, cənab Ali Baş Komandan, bu günlər hamımızın qəlbi qürurla doludur. Mən də keçirdiyim sevinc hisslərini sözlə ifadə edə bilmirəm, fərəhdən göz yaşlarımı saxlaya bilmədim. Siz bizim müdrik, uzaqgörən liderimizsiniz. Xalq həmişə olduğu kimi ətrafınızda sıx birləşərək Sizə güvənir. Zəfər bizimdir. Cənab, Ali Baş Komandan, Sizin komandanlığınızla şanlı ordumuz müqəddəs üçrəngli bayrağımızı, İnşallah, Qarabağda dalğalandıracaq. Ordumuzun zəfərinə çox sevinirik. Bu qələbə əzmini, zəfər sevincini bizə yaşatdığınız üçün Sizə dərin təşəkkür edirik. Sizə, Azərbaycana, şanlı ordumuza daha böyük uğurlar, zəfərlər arzulayıram. Allah Sizə yar olsun. Allah Sizi, xalqımızı, ordumuzu qorusun”.
Zaqatala şəhərindən Samir Rəhimov: "Möhtərəm və əziz Prezident, son günlər Azərbaycan Silahlı Qüvvələri qazandığı böyük uğurlarla xalqımızı sevindirir. Dünyadakı bütün azərbaycanlılar Sizin rəhbərliyinizlə ordumuzun bütün torpaqlarımızı işğaldan tam olaraq azad edəcəyinə inanırıq. Bu müqəddəs yolda zəfərin müjdəçisi olan şanlı Ordumuza uğur arzulayırıq. Allah Sizə uzun ömür, cansağlığı versin. Biz hər an Sizinləyik. Allah Sizi qorusun”.
Qazax rayonunun sakini Ülvi Zeynalov: "Möhtərəm Prezident, cənab Ali Baş Komandan, Sizin qətiyyətli, müdrik və cəsarətli siyasətiniz Azərbaycan xalqını hər zaman uğurlu gələcəyə, parlaq qələbəyə doğru aparır. Biz qazaxlı gənclər olaraq Sizin və Ordumuzun ətrafında sıx birləşmişik, xalqımızın işıqlı gələcəyi naminə atdığınız hər bir addımı dəstəkləyirik. Biz Sizin rəhbərliyinizlə əzəli və tarixi Azərbaycan torpaqları olan Dağlıq Qarabağın, o cümlədən, ətraf 7 rayonun birmənalı olaraq düşmən tapdağından azad edilməsi müjdəsini səbirsizliklə gözləyirik. Cənab Ali Baş Komandan, Siz müstəqil Azərbaycanın ərazi bütövlüyünü təmin edən, əzəli və əbədi torpaqlarımız olan Dağlıq Qarabağı işğaldan azad edən sərkərdə kimi tarixdə qalacaqsınız. Əminik ki, gələcək nəsillər ən yeni tarix dərsliyində bu ifadə ilə qarşılaşacaqlar. Bu tarixi anları Azərbaycan gəncliyinə yaşatdığınız üçün Sizə minnətdarıq. Biz Sizinlə fəxr edirik. Uca Tanrı Sizi qorusun”.


Sabirabad rayonunun Suqovuşan kəndindən Xalid Əliyev: "Möhtərəm cənab Prezident, bu günlərdə Qarabağ uğrunda gedən mübarizədə Sizinləyik. Bildirmək istəyirəm ki, Sizin yürütdüyünüz siyasəti, atdığınız hər bir addımı tam dəstəkləyirik. Cənab Ali Baş Komandan, Ordumuz Sizin siyasi iradənizdən, millətə olan sevginizdən güc alaraq, böyük ruh yüksəkliyi ilə uğurlu əməliyyatlar həyata keçirir, zəfərlər qazanır. İnanıram ki, bu qələbələr davamlı olacaq, bizə məxsus torpaqlardan sonuncu erməni əsgəri çıxanadək mübarizəmizi davam etdirəcəyik. Atdığınız hər bir addıma, qazandığınız hər bir uğura görə Sizə minnətdaram. Qarabağ bizimdir! Qarabağ Azərbaycandır!”.


Sumqayıt şəhərindən Qivami Cavadov: "Cənab Ali Baş Komandan, Sizin rəhbərliyinizlə Ordumuz 30 illik işğala son qoyaraq, Azərbaycan torpaqlarını xain düşmənlərdən azad edir. İgid əsgərlərimiz yeni tarix yazırlar. Bu gün bütün xalq bir yumruq kimi Sizin ətrafınızda cəmləşib, Sizinlə fəxr edir. Yürütdüyunüz məqsədyönlü siyasəti dəstəkləyir, atdığınız hər bir addımı təqdirəlayiq sayırıq. İnşallah, yaxın günlərdə Azərbaycanın üçrəngli bayrağı azad olunan rayon və kəndlərimizdə dalğalanacaq. Mən öz adımdan və ailəm adından Sizə çox-çox minnətdaram. Hər zaman Sizin yanınızdayıq. Allah Sizə uzun ömür, cansağlığı versin”.


Bakı şəhərindən dosent David Nəsibov: "Hörmətli cənab Prezidentim, bir həftədir ordumuzun zəfər yürüşü ilə torpaqlarımızı 30 ildir işğalda saxlayan, tərəfdaşları ilə yalançı sülh danışıqları vasitəsilə vaxtı uzadan, ancaq heç vaxt, heç bir şərt müqabilində torpaqlarımızı qaytarmağı ağlından belə keçirməyən, çox hiyləgər, işğalçı, mənfur ermənilərdən azad etməsi ürəyimizi fəxarət hissi ilə döyündürür. Sanki yenidən doğuluruq, keçirdiyimiz bütün ağrı-acılar unudulur, uçmaq üçün qanad istəyirik. İnanırıq ki, bu zəfər yürüşü axıradək davam edəcək. Sizin çıxışlarınız, onlara və havadarlarına verdiyiniz haqlı, məntiqi və sərt cavablar bizləri buna bir daha inandırır. İnanın ki, bütün millətimiz böyük ruh yüksəkliyi içindədir, heç bir çətinliklər, gələcək məhrumiyyətlər millətimizin bu ruhunu sarsıda bilməz. Millətimiz ömrü boyu Sizə minnətdar olacaq. Sizin rəhbərliyinizlə şanlı Azərbaycan ordusuna, millətimizə qalibiyyət diləyirik. Üçrəngli bayraqlarımızın işğal olunmuş bütün rayonlarımızda, kəndlərimizdə dalğalanmağına böyük inam hissi ilə yaşayırıq”.


Şəki şəhərindən Yusif Kərimli: "Hörmətli cənab Prezidentim, mənim 9 yaşım var. Şəki şəhəri 11 saylı orta məktəbin 4a sinif şagirdiyəm. 5 yaşımdan şahmatla məşğul oluram. 9 yaşım olmağına baxmayaraq şanlı bayrağımızı 4 dəfə dünya və Avropa çempionatlarında yüksək zirvələrə qaldırmışam. Hazırda Qarabağda başlayan zəfər dolu yürüşlərimizi mən və ailəm hər gün sevinc dolu göz yaşlarımızla izləyirik. İnşallah, gözəl bayrağımız qısa müddət ərzində Qarabağımızda və işğalda olan 7 rayonumuzda dalğalanacaqdır. Buna tam inamım var. Bu gün atamın 34 yaşı olur. Suqovuşanın işğaldan azad olunması atam üçün ən böyük hədiyyə oldu. Buna görə Sizə və bütün hərbçilərimizə təşəkkür edirik. Biz idmançılar bu haqlı mübarizəmizdə Sizinləyik. Qarabağ Azərbaycandır! Əminik ki, Sizin komandanlığınızla torpaqlarımıza qayıdacağıq”.


Lənkəran rayonunun Boladi kəndindən Akif Nəsirov: "Hörmətli cənab Prezident, cəbhədəki uğurlarımız münasibətilə Sizi ürəkdən təbrik edirəm. Sizə bu şərəfli və haqq yolunda daha böyük uğurlar qazanmağı arzu edirəm. Siz bizim güc və qürur mənbəyimizsiniz. Sizin yorulmaz fəaliyyətinizin nəticəsidir ki, bu gün qüdrətli Azərbaycan Ordusu öz vəzifəsini çox ləyaqətlə icra edir. Azərbaycan xalqı Sizinlə fəxr edir və Sizin arxanızdadır. İşğal altında olan torpaqların azad edilməsi ilə Azərbaycan Respublikasının Milli Məclisindən xahiş edərdim ki, Sizə "Azərbaycanın Milli Qəhrəmanı” adı verilsin. Bir daha Sizi və xalqımızı təbrik edirəm”.


Mingəçevir şəhərindən Anar Quliyev: "Hörmətli cənab Prezident, əvvəlcə onu qeyd edim ki, mən bir Azərbaycan vətəndaşı kimi Sizinlə fəxr edirəm. Bu gün mənim doğum günümdür. Mənə ən böyük hədiyyəni Siz verdiniz – Cəbrayıl şəhərini azad etdiniz. Buna görə Sizə və Ordumuza minnətdaram. Biz Sizin uğurlu daxili və xarici siyasətinizi həmişə dəstəkləmişik. Azərbaycan xalqı hər zaman Sizinlədir. Tezliklə Sizdən növbəti şad xəbərləri gözləyirik. Yaşasın Azərbaycan, var olsun Azərbaycan Ordusu! Yaşasın Azərbaycan xalqı!”.


Gəncə şəhərindən Rövşən Abbasov: "Hörmətli cənab Prezident, ordumuzun erməni faşistlərinə qarşı apardığı uğurlu əməliyyatlara, gözəl çıxışlarınıza görə Sizə minnətdaram. Biz deyəsən, uzun bir yolun sonuna gəlib çıxmışıq. Ötən illər ərzində ordu quruculuğu işlərinin mükəmməl təşkili və Sizin qətiyyətli mövqeyiniz bizə Qarabağı bəxş etməkdədir. İnşallah, gözəl üçrəngli bayrağımız Şuşada dalğalanacaqdır. Allah Sizi qorusun!”.


Sabirabad rayonunun Qaratəpə kəndindən Əlirza Hüseynov: "Hörmətli cənab Prezident, möhtərəm Ali Baş Komandan, Sizi, Mehriban xanım Əliyevanı və dünya azərbaycanlılarını tarixi torpaqlarımızın - Azərbaycan Respublikasının ayrılmaz tərkib hissəsi olan Dağlıq Qarabağ və ətraf rayonların düşmən tapdağından azad olunması münasibətilə təbrik edirəm. Sizə bütün Azərbaycan xalqının vahid Lideri və Ali Baş Komandanı kimi bu müqəddəs və haqq işində bizlərə bəxş etdiyiniz qələbələr üçün sonsuz təşəkkürümü bildirirəm. Sizin siyasətiniz Azərbaycan xalqının ümummilli lideri Heydər Əliyev siyasətinin layiqli davamı və Azərbaycanı işıqlı gələcəyə aparacaq yeganə siyasətdir”.


Şirvan şəhərindən Rəşad Abdulla: "Cənab Ali Baş Komandan, 27 sentyabr tarixindən Sizin komandanlığınızla əzəli torpaqlarımızın geri qaytarılması istiqamətində qazandığımız qələbələr bir vətəndaş olaraq hamımızı qürurlandırır və Sizin ətrafınızda daha sıx birləşməyə, çalışdığımız sahə üzrə fəaliyyətimizdə daha diqqətli və dəqiq işləməyə ruhlandırmışdır. Sizə gecəli-gündüzlü çəkdiyiniz bu əziyyətlərdə uca Allahdan cansağlığı, səbir diləyirik. Sizin komandan kimi apardığınız taktiki gedişlərdə qüsursuz vətəndaş kimi hər zaman Sizin ətrafınızda sıx birləşmişik. Hər hansı bir əmrinizi yerinə yetirməyə sıravi əsgər kimi hazırıq. Ümummilli liderimiz Heydər Əliyevin Sizə etibar etdiyi Azərbaycanımızın ərazi bütövlüyü və iqtisadi inkişafı istiqamətində gördüyünüz bütün fəaliyyətinizi dəstəkləyirik və Sizinlə birlikdə bu fəaliyyətinizin bir damlası olmağımızla fəxr edirik. Əzəli torpaqlarımızın geri qayıtması sevincini, qələbəsini görmək bizə yaşamaq, yaratmaq şövqü verdi. Bundan sonra daha çox çalışmaq və Sizin ətrafınızda yumruq kimi birləşmək hamımızın vətəndaşlıq məsuliyyətimizi artırır. Fəaliyyətinizdə, Azərbaycanımızın ərazi bütövlüyünün bərpa edilməsi uğrunda apardığınız mübarizənizdə, dövlətçiliyimizin və iqtisadiyyatımızın inkişafında çəkdiyiniz zəhmətinizə görə Sizə, birinci xanım Mehriban Əliyevaya dərin təşəkkürümüzü bildirir, uca Allahdan cansağlığı, uzun ömür diləyirik. Sizə təşəkkür edirik. Əminik ki, Sizinlə birlikdə güclü olduğumuza inanırsınız. Çox Sağ olun”.


Bakı şəhərinin Nizami rayonunun sakini Sevda Abuzərli: "Əziz Prezidentimiz İlham Əliyev, cəbhədə qazandığımız uğurlar bizi həddən artıq sevindirdiyindən övladlarım bir neçə gündür ki, israrla Sizə məktub yazmaq istəyirlər. Mən isə onlara qələbə günündə təbrik məktubu yazarıq söyləyirdim. Bu gün Gəncədə yaşayan valideynlərimlə danışdıqdan sonra onların Prezidentimizə - Sizə olan etibarını, inamını çatdırmağı özümə borc bildim. Əziz Prezidentimiz, mən Sizə və Ordumuza güvəndiyimi bildirərək övladlarımın da ürək sözlərini Sizə çatdırmaq istərdim. Belə ki, qızım Dunay Sizin "Rossiya-1” televiziya kanalındakı çıxışınızı alqış və sevinclə qarşıladığını, daim Sizinlə olduğunu qeyd etməyimi xahiş etdi. Böyük oğlum, Atilla adlı sərkərdəm isə Xankəndidə - Xanın kəndində bayrağımızın dalğalanacağı günü səbirsizliklə gözləyir. On yaşlı Altay balam isə bu yaşda belə Sizin müsəlləh əsgəriniz olmaq arzusundadır.
Sizi və Şanlı Ordumuzu dəstəkləyirik!
Ürəyim, canım, şöhrətim, şanım,
Eşqinlə yanım, Azərbaycanım!”.
Balakən rayonundan Xacay Qafarova: "Möhtərəm cənab Prezident, Sizi bir gənc olaraq, bir vətəndaş olaraq səmimiyyətimlə və bütün qəlbimlə dəstəkləyirəm. Aldığınız düzgün qərarların nəticəsinin gətirdiyi xoş xəbərlərə bir azərbaycanlı kimi çox sevinirəm. Sizə inamımız və etibarımız tamdır. Bu gün Azərbaycan Respublikasının ərazi bütövlüyünün təmin edilməsi Sizin dərin strategiya və düzgün yeridilmiş siyasi qərarlarınızın nəticəsidir. Biz gənclərin daim Sizi dəstəklədiyimizi və Sizin yanınızda olduğumuzu bildirmək istəyirəm. Qarabağ bizimdir! Qarabağ Azərbaycandır!”.


Biləsuvar rayonunun Amankənd kəndindən Mail Hüseynov: "Çox hörmətli Prezidentimiz, cənab Ali Baş Komandanımız, işğalçı dövlətə qarşı apardığınız mübarizədə Azərbaycan xalqı həmişə Sizinlədir. Ordumuzun düşmənə tutarlı cavabı hər bir azərbaycanlı kimi, mənim də qəlbimi fəxr hissi ilə doldurur və qürurlandırır. Cənab Prezident, hazırda iki övladım cəbhədə döyüşür. Böyük övladım Aprel döyüşlərinin iştirakçısı olub, həmin döyüşlərdə yaralanıb, indi yenə torpaqlarımızın azadlığı uğrunda vuruşur. Sizin rəhbərliyinizlə xalqımızın savaşı haqq işidir. Haqq işi hər zaman qalib gələcək. Sizə və Azərbaycan xalqına Qələbə, yeni-yeni zəfərlər arzulayıram. Allah bu haqlı savaşda Ordumuzla və Sizinlə olsun. Xalq və Ordu həmişə bir yerdədir. Biz birlikdə güclüyük”.