Sosial
14.04.2023
136
"Qeyri-sabit hava şəraiti ilə əlaqədar əsgərlərimizin Ermənistan ərazisinə keçməsi, əsir götürülməsi, onlara işgəncələr verilməsi ermənilərin və Ermənistanın simasını dünyaya növbəti dəfə bəyan etdi".
Operativ24 xəbər verir ki, bunu Dini Qurumlarla İş üzrə Dövlət Komitəsinin sədri Mübariz Qurbanlı deyib.
O bildirib ki, bütün bunlar beynəlxalq konvensiyalara, sənədlərə ziddir:
"Ermənistan Xocalıda etdiyi vəhşiliyi bu gün bunu əsgərlərimizin üstündə təkrarlayır. Nəinki təkrarlayır, həm də dünyaya çəkib göstərir. Onlar silahsız, əli bağlı əsgərimizə olan işgəncəni çəkib göstərməklə ki, müharibədəki məğlubiyyətini kompensasiya etməyə çalışır. Bu qətiyyətlə pislənilir. Bu cinayəti törədənlər cavab verməli olacaqlar. Onlar hər hansı əməliyyatı yerinə yetirmirdilər. Baş verənlər insanlıq əleyhinə törədilmiş cinayətlər sirasındadır.
Azərbaycan xalqı və cəmiyyəti bunu nifrətlə qınayır".
Qeyd edək ki, Azərbaycan Ordusunun əsgərləri - 2004-cü il təvəllüdlü Bəbirov Aqşin Qabil oğlu və 2003-cü il təvəllüdlü Axundov Hüseyn Əhliman oğlu bir neçə gün öncə Naxçıvan Muxtar Respublikasının Şahbuz rayonunun Ermənistanla sərhəd ərazisində əlverişsiz hava şəraitində məhdud görmə səbəbindən itkin düşüblər.
Ermənistan Müdafiə Nazirliyi aprelin 13-də Azərbaycan əsgərlərinin Ermənistanda saxlandığını etiraf edib.
Sosial şəbəkələrdə və Ermənistan mediasında ermənilərin əsir götürdükləri Azərbaycan hərbçisini döymələri, ona ağır işgəncə vermələri ilə bağlı görüntülər yayılıb.
Əsir və itkin düşmüş, girov götürülmüş vətəndaşlarla əlaqədar Dövlət Komissiyası Azərbaycan Ordusunun itkin düşən iki əsgəri ilə bağlı beynəlxalq təşkilatlara müraciət edib.