İdman
8.10.2022
276
Oktyabrın 8-də Bakı kənd və qəsəbələri arasında uşaq futbol turnirinə start verilib. Gənclər və İdman Nazirliyi və Bakı Abadlıq Xidmətinin təşkilatçılığı, Azərbaycan Futbol Federasiyaları Assosiasiyasının dəstəyi ilə keçirilən yarışlarda 32 kənd və qəsəbənin uşaq futbol komandası mübarizə aparacaq.
Bakı Tennis Akademiyasında keçirilən açılış mərasimində əvvəlcə dövlət himniminz səsləndirilib və torpaqlarımızın azad edilməsi uğrunda canından keçmiş Şəhidlərin əziz xatirəsi bir dəqiqəlik sükutla yad edilib.
Tədbirdə gənclər və idman naziri Fərid Qayıbov, müdafiə sənayesi naziri, Azərbaycan Velosiped Federasiyasının prezidenti Mədət Quliyev, Bakı Abadlıq Xidmətinin rəhbəri Bünyad Qasımov və millət vəkili, Azərbaycan Futbol Federasiyaları Assosiasiyası İcraiyyə Komitəsinin üzvü Rauf Əliyev çıxış edərək turnir iştirakçılarına uğurlar arzulayıblar.
Turnirdə iştirak edən bütün uşaqlara “İSMA bikes Azərbaycan” şirkəti velosiped hədiyyə edib. Tədbirdə futbolçular Şahruddin Məhəmmədəliyev, Maksim Medvedev, Elvin Camalov və Azər Salahlının uşaqlar üçün imza sessiyası da təşkil olunub.
“Qarabağ” futbol komandasının baş məşqçisi Qurban Qurbanovun topa ilk zərbə vurması ilə Yeni Suraxanı - Əmircan oyununa start verilib.
Turnirin keçirilməsində əsas məqsəd uşaq futbolunun inkişafı və təbliği, eyni zamanda idmanın kütləviliyinə nail olmaqdır. Yarışlara 2010-2011-ci il təvəllüdlü, ümumilikdə 350-dən çox uşaq cəlb olunub. 8 qrupda start götürən turnirə noyabrın 13-də final qarşılaşması ilə yekun vurulacaq.