Bu gün Xalq artisti Röya Ayxanın 40 yaşı tamam olur.  

Operativ24.Az  milyonların sevimlisinin “Zirvəyə gedən yolu”nu təqdim edir.  

Nəcəfova Röyalə Yaqub qızı 1982-ci il iyunun 14-də Bakıda anadan olub. Bakı şəhəri Nəsimi rayonu 5 saylı orta məktəbin məzunu olan Röya 2004-cü ildə “Bakı Dövlət Universiteti”nin “Beynəlxalq hüquq” fakültəsinə daxil olub.  

Müğənni ilk addımlarını Əməkdar incəsənət xadimi Vaqif Gərayzadənin “W-trio” qrupunda atıb. Bir neçə ildən sonra Röya qrupdan ayrılıb solo fəaliyyətə başlayıb. 2005-ci ildə Heydər Əliyev Sarayında "Bu gecə" adlı ilk solo konserti olub.

2006-cı ildə 3 gün yenidən həmin sarayda "Darıxmışam" adlı solo konsert verib. 2006-cı il sentyabr ayının 15-də Şəfa stadionunda və sentyabr ayının 22-də Milli Parkda solo konserti olub.  

2005-ci ildə Yalta şəhərində keçirilən Beynəlxalq Gənc İfaçılar müsabiqəsində "Tamaşaçı simpatiyası" nominasiyası üzrə laureat olub. Pop ulduz iki dəfə 2017-ci və 2020-ci ildə Türkiyənin nüfuzlu “Altın Kelebek” mükafatına layiq görülüb.  

30 dekabr 2015-ci ildə Əməkdar artist, 21 oktyabr 2019-cu ildə isə Xalq artisti fəxri adına layiq görülüb. 2008–2014-cü illərdə iş adamı Anar Cəlilovla nikahda olub. Onun bu nikahdan 13 yaşlı Hüseyn adlı oğlu var.  

Operativ24.Az  komandası Xalq artisti Röya Ayxanı təbrik edir, fəaliyyətində müvəffəqiyyətlər arzu edir.