Dünən saat 14-00 radələrində Ağdam rayonunda erməni silahlı qüvvələrinin açdığı atəş nəticəsində yaralanan "Smart Com" MMC şirkətinin əməkdaşı Anar Rəhimli hadisə barədə danışıb.
Operativ24.Az-ın yerli bürosunun verdiyi məlumata görə, Anar Rəhimli Xaçın su anbarı istiqamıtində güllə yarası alıb.
"Xaçın su anabarı istiqamətindən qayıdırdıq və Talış yüksəkliyinə gedəcəkdik. Qarşımıza bir post çıxdı. İş yoldaşım avtomobildən düşüdü ki, yolu açsınlar. Düşündük ki, bizim postdur. Amma iş yoldaşım qaçaraq avtomobilə əyləşdi və dedi ki, təcili sür arxaya, bura erməni postdur. Avtomobili geriyə çevirən zaman düşmən atmağa başladı. Biz mülki geyimdə və mülki avtomobildə idik. Güllənin biri qoluma dəydi, sümüyüm sındı. Avtomobili idarə edə bilmədim, maşın dirəyə çırpıldı və o dərəyə düşüb aşdı. Sürünərək avtomobildən çıxdıq. Mən orada qaldım, iş yoldaşım telefon şəbəkəsi olan əraziyə qaçdı və kömək çağırdı.Təcili yardım gəldi və bizi əvvəl hərbi hospitala, oradan isə Gəncə şəhərindəki xəstəxanalardan birinə gətirdilər", - deyə Anar Rəhimli bildirib.
Məlumat üçün qeyd edək ki, A.Rəhimlinin müalicəsi davam edir. O, əməliyyat ediləcək.