“2-ci Qarabağ müharibəsi başlananda səfərbərliklə mən də ordu sıralarına qoşuldum. Sentyabrın 27-dən Cəbrayıl, Qubadlı və Laçının azadlığı uğrunda döyüşmüşəm. Yanvarın 9-da qayıdıb evimə gəlmişəm. Cənab prezident məni bir neçə medalla da təltif edib. Ağır döyüşlərdən şükür Allaha sağ-salamat çıxmışam. Amma gələndən heç bir kəs nə mənimlə, nə ailəmin yaşayışı ilə maraqlanmayıb. Canım ağrıyır, həkimə bir dəfə gedirəm, 2-ci dəfə getməyə pul tapmıram. Evimiz başımıza uçur, heç olmasa vətən müharibəsindəki iştirakıma görə mənə hörmət qoysunlar. Bunu da görmürəm”.
Bunu Moderator.az-a açıqlamasında Şəki rayonu Qayabaşı kənd sakini Hüseyn Eminov deyib. O daha sonra əlavə edib.
“İcra nümayəndəliyinə, kənd bələdiyyəsinə, Şəki rayon İcra Hakimiyyətinə müraciət etməyimə baxmayaraq heç kim mənə nə iş, nə də torpaq sahəsi vermir. Anam dünyasını dəyişib, iki bibim də bizimlə yaşayır. Mənim istəyim budur ki, heç olmasa məni işlə təmin etsinlər. İcra Hakimiyyətinə ailəlikcə getmişik, mühafizəyə tapşırıblar ki, onları içəriyə qoymayın, qaytarın dala. Mehriban xanıma məktub da yazmışıq, cavab gəlib amma o məktuba da baxan yoxdur. O məcburiyyətdə qalmışam ki, başqa ölkədə gedib yaşayım. Bundan başqa əlacım yoxdur! İnsanı bilərəkdən buna məcbur edirlər. Cənab prezidentin şəhid ailələri, qazilər və döyüşçülərlə bağlı tapşırığını icra etmirlər, bizə zülm verirlər. Yetim oğlanam, xahiş edirəm mənə kömək edin”, - deyə Hüseyn Eminov deyib.
Vətən müharibəsi iştirakçısı iş istədiyinə görə məhkəməlik olduğunu da bildirib.
“Bələdiyyə sədrimiz Sahib Əliyevin qəbuluna gedib, iş istədim. Elə də böyük bir iş istəmədim. Burada yol kənarlarını təmizləyirlər, bütün qohumlarını ora düzəldib. Dedim ki, məni də işə götür, mən də təmizlikçi kimi işləyim. Bir az söz-söhbətimiz oldu, dava düşdü. Məni qınamayın, döyüşdən gəlmişəm, əsəblərim yerində deyil. Bu onun qəbuluna neçənci gedişim idi ki, məni qapıdan əliboş göndərirdi. Götürüb verib məni məhkəməyə. Artıq neçənci məhkəmə prossesidir ki, uzana-uzana gedir. Növbəti məhkəmə noyabr ayının 12-də baş tutacaq. Təbii ki, onun xeyrinə qərar çıxarırlar. Kənd adamıyam, savadım və pulum yoxdur deyə hər bir şeyi üstümə yükləyiblər. Döyüşlərdə əziyyət çəkib gələn bir insana bu zülmü yaşatdıqlarına görə Allahdan onlara insaf, vicdan istəyirəm. Onların milyonu və kənddə 3-4 dənə fermaları var. Hal-hazırda qardaşım da Kəlbəcərdə xidmət edir. Biz vətənimizi sevirik, bizi vətənimizdən küsdürməsinlər”, - deyə şikayətçi bildirib.